Azərbaycan və YUNESKO birgə həyata keçirilən layihələrlə bağlı mühüm planlara malikdir. Bu barədə prezident İlham Əliyev cümə axşamı YUNESKO-nun yeni baş direktoru İrina Bokovanı qəbul edərkən bəyan edib.

“AzərTAc” dövlət informasiya agentliyinin verdiyi xəbərə görə, İ.Bokovanın YUNESKO-nun baş direktoru seçilməsi münasibətilə təbrik edən İ.Əliyev onun bu yüksək vəzifədə ilk səfərlərindən birini Azərbaycana etməsindən məmnunluq bildirib. O vurğulayıb ki, bu, qarşılıqlı fəal əməkdaşlığa daha da təkan verəcək.

Son zamanlar YUNESKO ilə həyata keçirilən birgə işlərə toxunan dövlət başçısı ikitərəfli əməkdaşlığın bundan sonra daha da genişlənəcəyinə ümidvar olduğunu bildirib.

Öz növbəsində, İ.Bokova YUNESKO ilə Azərbaycan arasında çox yaxşı əməkdaşlığın olduğunu qeyd edərək rəhbərlik etdiyi təşkilatda YUNESKO-nun xoşməramlı səfiri Mehriban Əliyevaya hamının çox böyük hörmətlə yanaşdığını deyib. O, Mehriban Əliyevanın mədəniyyət, musiqi, adət-ənənə kimi ən əhəmiyyətli sahələrin inkişafına verdiyi töhfəni yüksək qiymətləndirib.